أنور الوراقى يكتب مندهشا عن وفاء الخطيب لصاحبه نبيل الحلفاوى

الخطيب ساب سعاد حسني وإلهام شاهين وقرر يمثل مع محمد فراج وبيومي فؤاد..
الكابتن محمود الخطيب هيظهر في مسلسل اسمه “كتالوج” من إخراج وليد الحلفاوي، ابن الفنان الراحل نبيل الحلفاوي، اللي كان مصمم إن الخطيب يقوم بالدور ده..
الخطيب هيكون ضيف شرف في المسلسل، وهيطلع في مشهد مؤثر علشان يوجه رسالة عن دور الآباء في توعية الأبناء ومساندتهم وغرس القيم والمبادئ فيهم..
المسلسل من بطولة محمد فراج وريهام عبد الغفور وصدقي صخر وبيومي فؤاد..
طبعًا الخبر هيخلي المسلسل يتباع ويتشاف بشكل أسطوري، أفتكر مفيش دعاية أنجح من كده لما تشوف الكابتن الخطيب ممثل على الشاشة مش عارف لأول مرَّة واللا لأ لأنه سبق وعمل إعلانات فيها تمثيل بشكل أو بآخر..
بس الغريب إن الخطيب رفض لعب أدوار بطولات زمان؛ يعني فيلم غريب في بيتي كان المفروض هيكون بطولته مع سعاد حسني، وكان هيقوم بدور شحاتة أبو كف، اللي عمله بعد كده نور الشريف..
الخطيب قال في لقاء تليفزيوني قديم إنه اتعرض عليه أجر خيالي وقتها (30 ألف جنيه) بس هو رفض علشان عاوز يستمر كنجم كورة، وقال مش لازم نجم الكورة يعمل كُل حاجة تمثيل وغناء، أنا عاوز أحافظ على موهبتي ومجالي الرياضي بس..
مش قادر أتخيل شكل الخطيب في دور شحاتة أبو كف، بس كان فيه دور تاني اتعرض عليه بعدها بسنين لفيلم بطولة إلهام شاهين، الفيلم ده كان اسمه موعد مع الرئيس، والخطيب كان معروض عليه دور البطولة الرجالي، لكنه تراجع ورفض، والدور راح وقتها للراحل فاروق الفيشاوي..
مش عارف بصراحة هل هو كويس واللا مش كويس إن رئيس النادي الأهلي يظهر ضيف شرف في مسلسل درامي، وطبعًا مفيش مقارنة مع صالح سليم اللي عمل أدوار بطولة سينمائية بارعة، لكنه وقتها مكانش رئيس النادي الأهلي..