بودكاست ردايو القاهرة وتجربة نجاح غير مسبوقة فى الإذاعات العربية

من السبت للثلاثاء س 11 م يمكن لحضراتكم متابعة أصوات إذاعية جديدة و متميزة بأفكار مختلفة و لغة حوار شبابية راقية كل ده من خلال برنامج اسمه بودكاست .
الحقيقة هو برنامج مجهد جدا في اختيار المحتوى اللي يليق بمستمعي الراديو مع مراعاة الأعراف الإذاعية الكلاسيكية ، احنا بناخد حلقات من أشهر صناع المحتوى – بعد سماحهم كتابة بكده طبعا – و بنراجع بنفسنا المحتوى ده ، و كل دورنا هو تقديم صانع المحتوى للجمهور و شرح فكرة البودكاست اللي بيقدمه في دقيقتين في مقدمة الحلقة ، ثم في النهاية بنلاقي حاجه في غاية العظمة و بنفرح بشبابنا أو الأساتذة الكبار اللي اخدتهم الصحافة أو الطب من هوايتهم و موهبتهم الحقيقية أو اللي مش متوفر لهم فرصة الالتحاق بمنصة رسمية إذاعية أو تليفزيونية و بيجتهدوا انهم يقدموا نفسهم على السوشيال .
ربنا أكرمني بصديقة جديدة اسمها رشا الديب – عرفتني عليها زميلتي الفاضلة الموهوبة أسماء سمير نجمة الشبكة الثقافية – رشا شخصية مثقفة جدا و اسكندرانية جدعة ساعدت بجد في اكمال تجربة البرنامج ده إلى أن وصل للمستمعين .
في حلقة الليلة دي مثلا يا ريت اللي يقدر يتابع حلقة من بودكاست اسمه صديقي المستدام للبودكاستر دينا حسن ، محتوى راقي جدا هدفه الحفاظ على البيئة لكن ده بيتم برقي و سلاسة و شياكة.
و في حلقة الثلاثاء ح نتابع صانعة محتوى اسمها دعاء صبحي بتشتغل على نفسها من سنين علشان تتحقق كمذيعة و بعدين وجدت في البودكاست وسيلة مشروعة و رائجة لتحقيق الحلم ده.
في النهاية تاكد لي إني كنت صح لما راهنت دايما على موهبة شبابنا ، و اللي من حقهم انهم يجدوا فرص حقيقية في منصات الإعلام الوطنية ، و إن المنصات دي تجدد شبابها بموهوبين حقيقيين ، و هذا أمر شرحه يطووووووول … لكن كان برنامج بودكاست أحدث تجاربنا المتواضعة لتحقيق الأمل ده.
شكراً جزيلاً ا. محمد نوار & د. محمد لطفي & د. هشام محفوظ إنهم سهلوا لي بموافقتهم تحقيق الهدف ده .