وشهد شاهد من أهلها
وأنا من أهلها انا راجل بشتغل في مجال السينما من اكتر من سبعة و تلاتين سنة و اشتغلت مع عظماء السينما سواء من بره مصر او من جوه مصر وعلشان انا مش عايز البوست يطول كأسماء اللي اشتغلت معاهم مش هكتب أسماء.
رسالتي النهارده هتكون لمعالي رئيس الوزارء الدكتور مصطفي مدبولي و اسمح لي سيدي إني هكتب اللي في قلبي يعني اللي هتقوله دماغي هكتبه يعني بفضفض مع سيادتكم و هبدأ في الموضوع علي طول اي حد في الدنيا و خصوصا اللي بيشتغل في مجالنا يسمع اننا هنعمل مدينة إنتاج كبيرة وعلي اعلي مستوي بستوديوهات عالمية و معدات جبارة طبعا هيكون في منتهي السعادة بس ليه و احنا عندنا مدينة إنتاج عظيمة ايوه عظيمة محتاجة بس ٢٥٪ من الفلوس اللي هنبني و نظبط بيها المدينة الجديدة و اوعد سعادتكم ان في حاله توفير ٢٥ ٪ فقط و تسويق شاطر مدينة الإنتاج الإعلامي بتاعتنا هتبقي في حتة تانية.
وبالمناسبة هي في حتة اولانية مش وحشة بس محتاجة تتطور و علشان تتطور يبقي حضرتك ادينا ال ٢٥٪ و هتشوف الفرق ( بقول ادينا كمصريين و مهتمين بالصناعة ) ملحوظة مهمة جدا معالي رئيس الوزارء.
ارجو ان حضرتك و مساعدين حضرتك يحطوها في الحسبان طلعت حرب مؤسس بنك مصر هو مؤسس استديو مصر ايضا وكنا بندرس في معهد السينما ( اصدقائي الاكاديمين يأكدوا كلامي ) ان طلعت حرب بني استديو مصر بعيدا عن العمار ب ٢٥ كيلو يعني كان عارف ان العمار هيوصل بسبب الاستوديو.
فهل من المنطقي نعمل مدينة انتاج و مجمع استوديوهات عالمية بجانب المتحف و الهرم و نعمل زحمة رهيبة متوقعة!
حتي لو كان فريق عمل التصوير الفريق اللي هيدخل يصور جوه الاستوديو مش محتاج يشوف الهرم في البك جراوند.
ابويا الله يرحمه كان دايما يقولي الجوده في الموجودطور المدينة اللي مهما صرفنا مش هنقدر نعمل زيها تاني حضرتك طورها ب ال٢٥ ٪ من اللي كنا هنبني بيه المدينة الجديدة كلمة كمان علشان نقفل الموضوع ده وبلاش تفكر حضرتك اننا نبنيها في العاصمة الجديدة لان برضه العاصمة عايزين نسيبها للأجيال الجديدة يعملوا افكارهم و مشارعهم و تعالي ننتج بالفرق أفلام.
و لو طولت عليكم استحملوني لاني هتكلم عن الخبر التانيو هو تسهيل تصوير الافلام الأجنبية في مصر و فكرة الشباك الواحد.
احنا في مصر و اسال مجرب و لا تسأل طبيب عندنا Egyptian Film Comission.
الصراحة و الحق يقال و عن تجربة تم تنفيذ مشروع ١٠٠ ساعة في الهرم مع مستر بيست علي احسن ما يكون وجهة مشرفة لمصر معالي رئيس الوزراء فكرة الشباك الواحد ناجحة في مصر من تقريبا سنتين او ٣ و كل الشكر لكم لانشغالكم بهذا الملف.
طب انت يا هشام عايز تطلب ايه من معالي رئيس الوزراء عايز اطلب منه بالاتفاق مع وزاره المالية و السياحة فكره ان يكون عندنا 30% Cash-back rebate يعني نرجع لفريق التصوير او الشركة المنتجة و المنتج ٣٠٪ من الفلوس اللي دفعها سواء فنادق او استوديوهات او معدات او تذاكر طيران.
و بالمناسبة الفلوس دي بتفرح اي عميل او منتج في الدنيا انه يرجعله فلوس من ميزانية Egyptian Film Comission ناجحين ١٠٠ في ال ١٠٠ في تسهيلات التصوير لانهم بيشتغلوا مع شركات في مصر معروفة عالميا بس ناقصهم ان مصر تساعدهم و نرجع للمنتج فلوس.
طب يا هشام ما الدولة كده تخسر بالعكس سعر الإقامة في الفندق مش دي الفلوس، لكن اللي هيدخل الفندق هياكل و يشرب و يكوي هدومه و يشتري حلويات و هيخرج يأجر عربيات و يشتري لبس و هدايا و ياكل و يروح اماكن سياحية اللي هنرجعه باليمين للمنتج.
هناخده بالشمال من فريق العملاء انها مقالة طويلة بس من فضلك معالي رئيس الوزاره استثمر في مدينة الانتاج الموجودة ب ٢٥٪ من اللي كنت هتدفعه و وفر ٧٥٪ من الفلوس اللي كنا هندفعها او ادهالنا ننتج بيها افلام هتساعد الصناعة في الازدهار انتوا متخيلين المدينة الجديدة هتكون بكام نقدر ننتج بيها كام فيلم، وأخيرا ممكن اللي مقتنع بالكلام يشير و اللي مش مقتنع يقول رأيه و اللي عايز يضيف ممكن و السينما محتاجة نظرة مش مناظرة.
