لكل واحد طالع يتهمنا بالتطبيل والنفاق لمجرد إننا خايفين على بلدنا، حابب أقولك فوق واصحى وفكك من الشعارات اللي بتودينا في داهية.
أنا لا ليا مصلحة مع حد ولا بدور على منصب، مصلحتي الوحيدة هي إن بلدي دي متقعش.
إحنا جربنا قبل كده ومستعدين نقولها بأعلى صوت: وجود الراجل ده أمان ومستعدين يكمل بأي مسمى وبأي طريقة، لأن مصلحة مصر وأمنها القومي فوق أي دستور وفوق أي كلام نظري.
إحنا عايشين في منطقة بتغلي، وبصوا حواليكم كده وشوفوا الدول اللي ضاعت وشعوبها اتشردت وبقت لا لاقية وطن ولا أمان لمجرد إنهم جريوا ورا ديمقراطية مزيفة وشعارات مستوردة، إحنا مش هنكرر المأساة دي ولا هنسمح لبلدنا تدخل النفق المظلم ده تاني.
إحنا بقالنا سنين بنبني، وجه الوقت اللي نحصد فيه اللي زرعناه في الجمهورية الجديدة؛ من بنية تحتية وطرق غيرت وش مصر، لتحديث مرعب للجيش بأحدث الأسلحة، لمدن عالمية ومشروعات عملاقة في كل شبر.
والأهم من كل ده، سياسة داهية بتعرف تحط خطوط حمراء في وقت الجد لأي متجاوز يحاول يقرب من أمننا.
الراجل ده من حقه، ومن حقنا عليه، إنه يكمل معانا المشوار لحد ما نشوف كلنا نتيجة الحصاد ده بعينينا.
مصر دي بلد عمرها 7 آلاف سنة، مش حقل تجارب، وحكمها مش لعبة يطمع فيها كل من هب ودب زي ما شفنا في خراب يناير لما بقى اللي يسوى واللي ميسواش فاكر نفسه ينفع يحكم مصر.
بلدنا في منتهى الخطورة ومحتاجة راجل من طراز خاص، راجل ابن المؤسسة العسكرية الشريفة اللي عرفنا فيه الأمانة والصدق وإدراك المسؤولية، مش تاجر شعارات ولا تاجر دين.
والناس اللي بتتحجج بالسن، ياريت يبصوا على ترامب وبوتين وأردوغان وشعوبهم المتمسكة بيهم عشان مصلحة واستقرار بلادهم.
عشان كده، إحنا بنطالب الرئيس السيسي وبنصر إنه يكمل ويحدد مدته الجديدة، بس المرة دي بنطالبه يركز في مدته الجاية على رفاهية المواطن الطيب اللي استحمل؛ عاوزين تركيز كامل على توظيف الشباب، واهتمام أكبر بالصحة والتعليم، ورعاية تليق بكبار السن اللي خدموا البلد دي.
ومن الآخر إحنا مابنثقش غير في جيشنا وولادنا الشرفاء اللي بيموتوا عشان نعيش، ومش هننسى الجماعة اللي جات بالديمقراطية المزيفة دي وكادت تضيع بلدنا لما حكمتنا في سنة واحدة.
مش بمزاجك يا ريس تسيب مكانك، ووجودك هو صمام الأمان الحقيقي، واللي عاجبه عاجبه، واللي عاوز يسمي خوفنا على بلدنا تطبيل، يروح يشوف الدول اللي حوالينا ويبكي على الأوطان اللي ضاعت بسبب الفوضى.
