تجربة ارتباطي بالفنان محمد منير كانت قاسية، قرر يسيبني بدون مقدمات قبل كتب كتابنا بـ 6 أيام فقط..
كانت صدمة كبيرة، وحسيت بخذلان شديد وقتها، لأني مكنتش متخيلة إزاي دا ممكن يحصل، وليه؟ لكن دلوقتي بحس إن دا كان الخير وإن الحياة كانت ممكن تبقى صعبة لو كملنا، فربنا قدر الخير.
مبحبش أتكلم في الموضوع دا، لأني بحترمه وبعزه وبحبه كفنان، وبتمنى له كل التوفيق والصحة، لكن دا مش هينفع إنها كانت من التجارب القاسية في حياتي، صدمة كبيرة إن دا يحصل لأي بنت، ولولا والدي مكنتش أعرف إيه اللي ممكن يحصلي، هو اللي وقف جنبي وساعدني لحد ما تجاوزت الصدمة، والدي اختلق ليه كل الأعذار، وبدأ يقنعني إنه عنده حق يسيبني، وبدأ يكلمني عن فرق السن اللي كان 20 سنة.
وبدأ يحسسني ان الانفصال قدري وخير لي، وإنه أحسن حاجة ممكن تحصل، بابا كان حاسس بخذلان زيي، بس كان بيحاول يساعدني ويشد ضهري علشان أتجاوز الصدمة، خاصة إن انسحابه من العلاقة كان قبل كتب الكتاب بـ6 أيام بس، بدون ما يقول أي أسباب، ولحد الآن والله ما أعرف هو مشي ليه، لكن في النهاية هو قراره..
صحيح ساعتها كنت بمر بلحظة صعبة، لكن دلوقتي شايفة إنه كان لصالحي.
الفنانة نجلاء بدر فى تصريحات صحفية
